網紅的藏寶箱做餐飲真係好吃力
話就話經濟唔好，但係好多時出現有工無人做嘅情況，有唔少酒店叫救命，請唔到房口炒散，偶爾收到一啲以前合作過嘅公司，托我班救兵，一間三四星酒店，開價$45一間，每日執16-17間，包兩餐，都好難搵人，就算搵到，做兩三日已經頂唔順要劈炮。
因為好惡做，Staycation客又late check out，又開party，梅開二度翻雲覆雨，啲師奶又要準時收工返屋企煮飯，難怪有唔少做開房口嘅阿姐，好多去哂醫院做。
飲食業咪又係一樣，經常聽到「糖水雄」少主吐苦水好難請人，工作時間長，福利無乜假期少（酒店或大集團或會好啲，以前喺香格里拉打工，一個基層員工出賣勞力一年，年尾份花紅真係隨時夠你買隻勞力士，又諗返起當年我喺Regent做Butler嘅年代，有唔少同事戴住隻勞洗大口仔嘅），又要輪班，又無得放紅日，斷六親嘅生活，唔少人聽到都耍手擰頭。
我自己就斷咗六親超過四份一世紀，朋友約我周末去食個晏行街睇戲，真係要撞正清大假或返通宵先得。
本來又想去「濃姐」食個佬飯，但係有員工射波，人手短缺之下只能開到中午，生意真難做。
結果又去「友利坊」，半肥瘦叉加煎雙蛋，滿足。
Search